Wednesday, October 31, 2012

Random thoughts ..



_ قالت هى عن " خِفّة الروح "

لو روحك فضلت خفيفة ماكنتيش هتحسي بقيمة
الحاجات الخفيفة اللي مخلياكي تعرفي ترفرفي
ماكنتيش هتعرفي قد ايه هما مهمين ..

لازم تتقل علشان تعرفي ايه المهم وتبقي عليه
وتعرفي ايه اللي نص نص وترميه ف ترجعي خفيفة تاني ..
كلنا بنتقل علشان نحط لزق على جناحتنا نستريح شوية
ونرجع نرفرف من تاني

فاتطمنى
وخليكي مع نفسك وارمي كل الهموم اللي متقلاكي دي

وارجعي طيري ورفرفي زي الأول !


 _ " وفى الموت مُتسعٌ للحياة "


هما الناس اللى دايما بيقولوا أنا مش خايف/ة من الموت !
متطمنين للدرجة دى ولّا مقتنعين بمقولة درويش بشكل أو بآخر بإن
" الموت لا يوجِع الموتى .. الموت يوجِع الأحياء "
ولا بيكدبوا على نفسهم وبيتظاهروا بعكس خوفهم
ولّا دا يقين بإن دى الطريقة الوحيدة اللى هيروحوا بيها لربنا !



_ " صُحاب ترانزيت "

أوقات بقيت بكره الناس اللى بتدى لغيرها
نصايح فى المطلق من غير تفسير
طريقة واحدة لتنفيذهم .. وأولهم أنا !


مش غلط إن حد يقولنا ” إوصل فى حزنك لآخره ” لإنه
هياخد وقته ويمشى زى حاجات كتيرة فاتت وأكتر جاية ..
هنستفيد ايه لما حد يلوّن لنا الدُنيا فجأة كدا
ويخرّجنا من أى حالة بنمر بيها _ بس _ ل لحظة !!
لو ملقيناش حلول وطريقة نخرج بيها من
دايرة مشاكلنا من غير ما نشيل فوق كتافنا
هموم زيادة … محدش هيعملنا دا
طول الوقت ..مفيش حد هيستنى معانا غيرنا احنا مهما عملنا !

وكل دا بيخلينى أصدق حقيقة حد مرة قالهالى إن " صُحابك كلهم ترانزيت "


_ " احتضار اكتوبر "

زى كل سنة بيجى ومعاه سنة جديدة من عمرى
وبداية جديدة مُبهجة ومُبشّرة بالخير .. وحبة دفا !
وبيمشى زى الضيف الخفيف ..

13 Ur opinion:

Ramy said...

كل سنة و أنت طيبة
(:

معرفش بامانة أن انتى مواليد شهر العظماء

.....

الموسيقى اللى أنت حطاها جميلة

أيوة صحيح

أصلها بتوجعنى

كل حاجة جميلة بتفكرنى بحاجات أجمل ضاعت منى

(:

انا مش مضايق علشان متفتكريش ان مودى مش حلو لالا خالص

أنا بقيت متعود و مُتكيف

............

التعليق بقى أيوة انا لسه معلقتش ((:

الجزء الأول

طب و اللى مش عارف يتقل يعمل ايه

يعمل أيه؟؟؟؟؟؟؟؟؟

.............

الموت

عارفه انا عمرى ما خوفت من الموت
بجد صدقينى مش عارف ليه

الخوف الوحيد منه انه ممكن حد يتوجع من موتى بس

و مخوفتش غير لما حبيتها
.............

عارفه انا مبحولش انصح حد غير حقيقى لما اقوله ازى يقدر يعمل النصيحة

لأن من غير الكتالوج (:

مش هتكون نصيحة

هتكون مجرد كلام بنقولة ممكن يكون كلام كويس بس
(:
............

اوعى اكون معيدتش عليكى فى العيد

لو معيدتش متقوليش

(:

بس انا اسف

وش مكسوف

جميل البوست بجد

و مبروك شكل المدونة الجديد

شكلها احلى

ذوقك حلو

((:

يلى بقى كفاية رغى

(:

فراشة said...

أي كومنت هيضيع طعم الكلام اللى هنا

أنا بس فرحت قوي لما لقيت حاجه جديدة مكتوبه :)


Timo.. said...

"وفى الموت مُتسعٌ للحياة "

خلتيني اسرح لبعيد قوووي
والغريبة اني كتبت كلام كتييير وكاني باعمل بوست جوة البوست..!!
واتمسح ..!!
وكتبت تاني..
وبرضه اتمسح..!!
تقريبا ها اقول لنفسي بصوت عالي:
It's a sign

Timo.. said...

كل نوفمبر وانت طيبة

Timo.. said...

سارة.. هو انت اللي عندي على الفيس...؟؟

Miss LoZa said...

أخيرا سارة كتبت !

وأخيرا أنا قريت !

فى الموت متسع للحياة

همممم

:)

بس كدهو

Sarah .. said...

Ramy :

:)
:)
:)

أيوة أنا هكتفى بالابتسامة بس رداً على تعليقك ..

معايدتك دايما بتوصل بشكل أو بآخر يا رامى :))

أنا غيرت المزيكا .. والجديدة مخصوصة ليك
يارب تعجبك من غير وجع المرة دى ..
:)

Sarah .. said...

فراشة :

لأ بالعكس صدقينى أى تعليق منك هيزود كتير :)

دايما بتبسط بوجودك هنا ,, وهستناكى ف البوست دا تانى
لو تحبى
:)

Sarah .. said...

Timo :

اممم .. طيب جرّب مرة كمان لو ممكن
أنا حابة أعرف كنت عايز تقول إيه :)

وكل اكتوبر كمان ;))
وإنت طيب دايما .. :)


هستناك تانى تكتب التعليق الشرير اللى اتمسح مرتين دا ! :)

....
و لأ مش أنا ..

Sarah .. said...

Miss LoZa :

وإنتِ أخيراً هنا .. مما يعنيلى الكثير ;)

الكلام اللى متقالش .. كبير
بس واصلنى !

وزى ما قال درويش :
‎و نحن نحب الحياة .. إذا ما إستطعنا إليها سبيلا‎ !
:)

P A S H A said...

الكلام اللي هنا دافي ورايق أوي
:)
كل سنة وانتي طيبة وبألف خير وصحة وسعادة
:)
تحياتي

Sarah .. said...

P A S H A :

تفتكر ؟ :) :)

وإنت طيب يا شريف ودايما بخير يارب :)

نهر الحب said...

سارة
بتوحشني كلماتك عشان من القلب


لازم تتقل علشان تعرفي ايه المهم وتبقي عليه
وتعرفي ايه اللي نص نص وترميه ف ترجعي خفيفة تاني

مش ديما بنعرف ده او بنعرفه متأخر لما بيكون فات وقت طويل واحنا تايهين...

****************
" الموت لا يوجِع الموتى .. الموت يوجِع الأحياء "

صح جدااا
تعرفي كنت لما اقول لو مت كذا كذا صحابي يقولولي بعد الشر اقولهم الموت مش شر الموت ده واقع..
الشر للي بنحبهم وحيزعلوا علي فراقنا

****************

..مفيش حد هيستنى معانا غيرنا احنا مهما عملنا

صح كمان
علي فكرة فيه ناس بيعلمونا القسوة واننا كمان نسيب الحبل زي ما هما سابوه قبلنا

*********************

اكتوبر
السنة دي كان احلي اكتوبر في حياتي
عشان كدة مميز
كدة حتخليني اكتب عنه بقي
:))

بحب اجي هنا
حلو شكل المدونة الجديد بس كنت بحب الشكل الاولاني