Saturday, December 22, 2012

عن ديسمبر والنهايات وأشياء أخرى ..


 

_عارف لمّا يكون يومك غريب مش ماشى بشكل طبيعى رغم إن محصلش فيه أحداث كتيرة شخصية أو عامة لكن من أول ما فتحت عنيك وإنت قلقان دا بالاضافة لإنك علطول مش متطمن أصلا .
طول اليوم قاعد تهرب من كل حاجة بتيجى ف خيالك وأفكارك السوداوية لكن بتقع قدامك حاجات
أغلبها كانت عن الثورة _ لمّا كانت ثورة _ وأعتقد إن لو كان امبارح ذكراها التانية مكنش
شريط السنتين اللى فاتوا عدوا بالسرعة دى .. !
وتبص ع الكاليندر فتلاقى إن دا 20 ديسمبر وزى اليوم دا من سنتين فاتوا كان آخر يوم فرحت فيه بجد ..
وإن لسه كام يوم على اليوم اللى بيمَثّل لك فعلا " لعنة " ومش قادر تتخلص منها !
 بس بردو تفضل تعانى فى إنك تدَخّل جوا دماغك فكرة " إن بكرا جىّ وهيكون أحلى "يمكن تقتنع ,
وخلاص بقيت بتفكر فى هابى ثوتس ..
لكن تيجى على نهاية اليوم تلاقى 2 من أصدقائك بيترجموا كل مشاعرك وأفكارك المتضاربة
 دى لكلام وبيكتبوك إنت ..
وبيعلنوها صريحة بإنك النهاردة تحديدا لازم تكون ضعيف وموجوع فمتعاندش واستسلم ..
فتروح تحضن نفسك وإنت بترتجف وتنام .. عشان بكرا ييجى لما تحط نهاية للنهاردة , مهما كانت !
_ ولازم فى كل شتا حاجة تحصل تخلينى
أحس بالبرد أكتر وأكتر وأكتر
ولغاية ما بينتهى وأنا بدَوّر على
سبيل للدفا , بس بدور فى حلقة مفرَغة !
_ نفسى فى مرة أقابل حد كبير عجوز بس يكون من الناس الحكيمة , الناس دى بتعرف إزاى تسمع كويس وبتعرف كمان تدينا من خبراتهم فى الحياة .. ونفسى أسمعهم .. يمكن يحسوا بشوية ونس وقتها .
كل ما بقيت بقابل حد منهم بفضل أتأمل فى ملامحهم وتجاعيد وشوشهم
اللى وراها مليون حكاية .. فببتسم لهم وبمشى !
محتاجة فعلا إنى أعرف أتكلم مع حد فيهم وأسمعه ..
_ مفتكرش إنى ممكن أعمل Wish List للسنة الجديدة  لإن اللى عملتها السنة دى أنصافها ما كملتش لسّه
وأنا مبقتش برضى بأنصاف الاحلام أو الحلول .. بس أتمنى قبل ما السنة دى تخلص إنى أطلع من المنحدر اللى واقعة فيه بقالى كام سنة من غير خساير أكبر وإن السنة تخلص ب " سلام نفسى "
دى آخر حاجة ممكن أمناها من السنة دى " !
_ " لازم يكون ف حياتك حد لما تحب تتكلم ف كلام فارغ ومش مفهوم
و تساؤلاتك الوجودية أو جنانك أو أفكارك الساعة 4 الفجر مثلا
تلاقيه موجود ويعرف يسمعك حتى لو من غير رد .. ! "
كان فيه أكتر من حد لكن كلهم طلعوا برا الدايرة
ولسه فاضل حد نصه بس جوا , وعشان أنا إيدى أضعف من إنى
أرجع أتمسك بيهم تانى .. فهخلى الدايرة تتقفل عليا لوحدى ..
_ " رب إنى لما أنزلت الى من خير فقير " .. :)

6 Ur opinion:

Nour said...

كان فيه أكتر من حد لكن كلهم طلعوا برا الدايرة
ولسه فاضل حد نصه بس جوا , وعشان أنا إيدى أضعف من إنى
أرجع أتمسك بيهم تانى .. فهخلى الدايرة تتقفل عليا لوحدى ..

the same here !!

راء said...

نوستالجيا ...


عارفة ، مبقتش عارفة فين الطريق
بس اي طريق بيخليني مبسوطة بمشي فيه حتى لو هتفضل الانكسارات والوجع والدنيا زي ما هي ، بس ع الاقل اي حاجة تخليني اكمل واي حد ملائم يمسك ايدي..الشتا مش عاوز وحدة

ربنا يرزقك سعادة من حيث لا تحتسبي :)

doaa elattar said...

سلام نفسى

يااااه ياسارة

أهي الأمنية دي هي المرادف الحقيقي للسعادة

السلام النفسي كلنا بنلف نلف وبندور في نفس الدايرة عشان بس نوصل لـ ده

"سلام نفسي"

ــــــــــ
كان فيه أكتر من حد لكن كلهم طلعوا برا الدايرة
ولسه فاضل حد نصه بس جوا , وعشان أنا إيدى أضعف من إنى
أرجع أتمسك بيهم تانى .. فهخلى الدايرة تتقفل عليا لوحدى ..

هل هما بيخرجوا من الدايرة لأن إيدينا أضعف من إنها تتمسك بيهم ولا لأن هما قرروا يسيبوا إيدينا

بيتهيألي حتى لو إيدينا ضعيفة فهما المفروض يكونوا موجودين عشان و
يقوناويطبطبوا على قلوبنا

وإلا هيكون إيه الفرق بينهم وبين اللي مش دخلوا الدايرة أصلاً ..؟
ـــــــ

يارب السنة الجاية تكون سنة سلام نفسي ودفا عليكي :) :)

نهر الحب said...

ياااااااااااه
شوفي بقالي كتير مش بقرأ لأي حد
وجيت عندك لقيت بوست جديد

كلامك وجعني اووووي اوووي
زي كلامك ديماً

نفسي اقول حاجة هنا
ساعات مش بنندم علي ناس عرفناهم وحبيناهم
بس بنزعل علي انهم بقوا ولا حاجة...
ومع ذلك لسه ليهم مكان...ولو صغير

لازم فى كل شتا حاجة تحصل تخلينى ))
أحس بالبرد أكتر وأكتر وأكتر
ولغاية ما بينتهى وأنا بدَوّر على
سبيل للدفا , بس بدور فى حلقة مفرَغة ((!

لازم يكون ف حياتك حد لما تحب تتكلم ف كلام فارغ ومش مفهوم
و تساؤلاتك الوجودية أو جنانك أو أفكارك الساعة 4 الفجر مثلا
تلاقيه موجود ويعرف يسمعك حتى لو من غير رد .. !

عارفة كلنا بنتمني وجود الحد ده بس صدقيني وهو موجود فيه حاجات برضه مش بنقدر نقولهاله وبتفضل جوانا عاملة حمل تقيل اووي علي قلوبنا

..
ماتخليش دايرتك تتقل عليكي لوحدك بسبب ناس مقدروش يخشوا جوه الدايرة دي
اختاري اللي يدخل فيها يكون يستاهل بجد يبقي جمبك

يمامة شاردة said...

انتي كمان عاملة دايرة؟

مش لوحدي يعني :))


عموما أريح حاجة إنها تتقفل عليكي لوحدك..كفاية أعباء بأه

Timo.. said...

كل سنة وانت بكل الخير
ويارب السنة الجديدة تكون عليك سعيدة