Wednesday, February 22, 2012

بداية جديدة ..





_ زى كل حاجة مع الوقت بتتنسى .. الذكريات كمان
عندى حنين غريب الفترة دى لحاجات كتيرة بحبها وبطلت أعملها
هواياتى كمان مبقتش أهتم بيها .
آخر مرة مشيت فيها لفترة طويلة أوى وصلت لساعات
كانت من شهور , أقرب لسنة
تقريبا استهلكت فى اليوم دا كل القوة اللى جوايا
وفى نفس اليوم بطلت أبص فى وشوش الناس
اللى كانت بالنسبالى حواديت وحكاية مختلفة ورا كل وش بنى آدم بقابله .

.......
_ تعرفى .. بحس إن حالة الحزن بتليق عليّا أكتر !

وقتها إنتِ مصدقتنيش أو مفهمتنيش
ويمكن  كنت أقصد حالة الوحدة وأسأت التعبير وقتها
_ لإن الاتنين حالتين قريبين من بعض بالنسبالى _
بس الحالة دى مش بتوصلنى لإكتئاب أو زعل حقيقى
بالعكس دى بتقربنى لنفسى أكتر .. بدوّر جوايا من تانى
على حاجات تاهت وسط مليون حاجة تانية
ومفيش غير الحالة دى اللى بتخلينى ألاقيها وسط الزحمة
بحب نفسى أكتر وقتها .. :)


.......
 أنا اتغيرت أوى .. فى مدة قليلة أوى كمان_
بكل الحلو والوحش فيه .. التغيير دا راضينى نوعا ما
بقيت أنضج كتير , تفكير , تصرفات  , ومشاعر
تحمل مسئوليتى لنفسى بشكل أكبر كمان .
والوحش لسه بيتغير
ولسه فيه حاجات جميلة شايلاها فى أبعد حتة فى قلبى
زى ما اتوجدت فيّا ..

بس
ليه دايما الناس بتفتكر التغيير حاجة وحشة ومش محببة !!

.........
البدايات الجديدة دايما مبهرة ..مميزة جدا_
لسه بؤمن بيها .. لانها لسه بتدينى أمل
بس أنا كنت بخاف من المغامرة
ومن يومين بس قررت مخافش تانى
بعد ما ربنا بعتلى رسالة فى حلم .. طمنتنى
شكرا يارب .. :)

..........
22 February ..
عدى سنتين هنا فى البلوج .. وبقى المكان الوحيد اللى بيونسنى ويدفينى ..
لكل حد كان السبب فى وجودها
ولأصحاب القلوب الطيبة وتعليقاتهم
شكرا بجد .. أنا ممتنة ليكم .. :)

11 Ur opinion:

Miss LoZa said...

آآآآآآآآه

سارة حبيبى جات هيه سارة حبيبى جات هيه

مش هعلق على أى حاجة ومش هقولك غير أنى منشكحة كدهو كدهو من البوست ده

وأنتى لازم تعرفى أنك غالية عندى لأنى قولتلك منشكحة وكدهو كدهو
الكلام ده مش بيطلع لأى حد والله
بس علشان أنتى سارة :)

ههههههههههههههههههه
تصدقى بالله امبارح قولت نفس الجملة بالظبط خالص مالص


ليه دايما الناس بتفتكر التغيير حاجة وحشة ومش محببة !!

وحشتينى :)

rona ali said...

:))))

التغيير احيانا بيكون حلو اوى ومفيد اوى ويناسب الوقت اللى بنكون حاسينه فيه

كمان البدايات دايما بننشد لبدايه كل قصه كل حوار كل كتاب وبدايه شئ جديد لم نختبر بعد

بوست رائع سارة مش تحرمينا منك
ومن تدوينك
ربنتا يوفقك للاحسن ويرزقك الاخير ليكى دايمآ :)

دعاء العطار said...

مين قال ياساره ان التغيير حاجه وحشه

بالعكس

التغيير للاحسن حاجه جميله جدا

لو وقفنا مكاننا ده ومش اتغيرنا ده معناه اننا مش استفنا او اتعلمنا اى حاجه من الدنيا

......

كللل سنه ومدونتك وانتى طيبيين :)

Ahmed ElGaMmaL said...

العفو العفو يا بنتى , ماتقوليش كدة , دة واجبنا بردو , انتى زى بنتى الصغيرة بردو :D
ههههههههه من غير ضرب و تريقة
هى دى طريقتى لما تبقى الحاجة عاجبانى
والبوست حلو اوى
بس خلاص

Nour said...

اللي شدني في البوست هو موضوع المشي ده لأني بقالي كتير جدا جدا مامشيتش لوحدي مسافة كبيرة برضه وبالنسبة للتغيير فده راجع اكتر لثقافتنا اللي بترفض كل ما هو جديد عموما حتى لو كويس
اما البدايات فزي ما قال جمال الغيطاني
للبدايات دائما شأن عظيم والبدايات لا تتكرر ابدا، فحافظي دايما على البدايات واتمسكي بيها :))

مش عارفة حسيت فجأة اني عاقلة كده ليه :D
اول مرة اجي مدونتك واعتقد مش هتكون الاخيرة ان شاء الله :D:D

نهر الحب said...

لا
...
الذكريات مش بتتنسي ابداااا مهما حصل بتفضل جوانا يمكن تستخبي لكن عم ما حاجة تمحيها
.......
احساس المشي لساعات ده من اجمل الحاجات اللي بعملها لما بحتاجها فعلا واحتاج اني اطلع طاقة جوايا

.....
..........
احساس الوحدة او الحزن كتير احنا اللي بندخل نفسنا فيه عشان يمكن بيكون عاجبنا اكتر او محتاجينه او بيعجنا عن الناس وزي ما قلتي فعلا بيقربنا لنفسنا
...
التغيير لو مقتنعة بيه ولو فيه حاجات فعلا كنتي عايزة تغيريها يبقي شيء كويس بس متهيألي ان فيه حاجات فينا مبنفعش تتغير ابدا مهما حصل
..
كل سنة وانتي والبلوج طيبين
:))

بحب فضفضتك شبهي كتير

The illusionist said...

ياه
وحضر الاب الروحى
ههههههههههههههههههه
قريت مره
ان التغيير شئ بيخوف الناس لاشعوريا عشان عندهم فى اللاوعى بيفتكروا ان ده شئ غامض ومضلم
انما انك تفضلى زى ما انتى
ده فى حد ذاته
استقرار وحاجات حلوه
حلو البوست الظريف اللى حصل فيه تفائل وحاجات كويسه
سالخير
اكتبى بانتظام بقى

شمس النهار said...

كل سنة وانتي ومدونتك بخير
بحب البوست اللي بيغوص في اعماق الاعماق

Bent Men ElZman Da !! said...

الواحد ممكن ينسى اى حاجه
بس الحنين دايماً بيفكرنا بكل حاجه وعمره ما بيتنسى

اوقات كتير بيبقى التغير كويس
واوقات بيبقى فعلا للاسواء

البدايات الجديده دايماً بدايه امل
انا مؤمنه اوى بكده

كل سنه ومدونتك موجوده وانتى معانا :))

Tamer Moghazy said...

ديما عندك حاجة حلوة..
يمكن دفء..
يمكن...روح..
او يمكن...
حاجة لسه ها اكتشفها...!!

شكرا لبلوجر انه جمعنا بيكِ :)

سَارةٌ said...

بحب فضفَضتِك يا ساره .. جداً يعني !
اكتبي واكتبي واكتبي كتير ..
حتى لو هتكتبي حاجات نوعاً ما كده
بس مَتبطليش كتابه :)
..
يا نهاااار .. أنا المكان هنا وحشني جداً جداً
* حضن عميق *