كان نفسى ادرس phonetics ..

ياااااه ع العبط والسذاجة اللى كنت فيها ويمكن _مازلت_ لما حلمت وافتكرت انى ممكن ادرس حاجة بحبها .. صح.

كنت فاكرة انى ممكن اتعلم وادرس انجليش بجد بدل الهبل اللى كنا بناخده بقالنا 8 سنين دا .. وفرحانة بقى وهبقى متمكنة من اللغة لغويا ونظريا والحياة بمبى وكدا .....          

   STOOOOP

    فوقت من الحلم

_المفروض_ ان عندنا مادة اسمها Phonetics او صوتيات .. وهى باختصار :

A branch of linguistics that comprises the study of the sounds of human speech .

والترجمة

انها فرع من علم اللغة واللى بتضم دراسة اصوات الكلام البشرى.

وباختصار اكتر : هى ازاى تعرف تنطق الحروف صح

تنطقها انجليش مش انجليش _فرنساوى او صينى اللى احنا بننطقه دا.

ولانه مفروض .. ف محصلش

كام كلمة بننطقها ورا ال دكتور من يوم ما دخلنا الكلية _مابيتغيروش ع فكرة_ وخلصنا

وااااااخر محاضرة كان بيبقى ف جيبنا امتحان المادة دى  _ ايه السعادة دى _ وبرده مش كلنا بنقدر فى المادة.

فى السكاشن بقى .. نفس الوضع .. ميختلفش كتير مع ان اسمها معامل لغات يعنى عشان تتدرب تنطق صح ازاى

معامل ايه _وسعت منى اوى دى_هو واحد بس وياريت ليه فايدة

دى اكتر مادة المفروض اننا داخلين الكلية عشان ندرسها

والنتيجة .................. :(

باقى المواد التانية حاجات اسمها دراما,تحليل نصوص,رواية,ادب كلاسيكى,ادب مقارن

وكل دول عبارة عن مسرحيات او روايات

مع بداية كل تيرم .. بقينا بنفتكر مجرد اسماء الروايات دى وفى الغالب الكل عنده زهايمر ومبيفتكرش .

كل دا مش جديد عليا ومش لسه واخدة بالى منه دلوقتى بس

لكن انا فاضلى سنة _ان شاء الله_ ويبقى معايا ليسانس اداب انجليش _ اعمل بيها ايه_ ؟!!

             كان نفسى اقعد 8 سنين بدل 4 لو ينفع بس ادرس صح

           بس اكتشفت انى فى مصر وانى فى جامعة حكومية .. لما فوقت من الحلم.

                ودى أخرة اللى يفكر يغمض عيونه ويتخيل او يحلم ..

              كان حلم وردى .. وراح .